इरानद्वारा दुई किशोरलाई बलात्कारको आरोपमा गोप्य रुपमा फाँसी

Tuesday, April 30th, 2019 | | अन्तराष्ट्रिय

इरानले १८ वर्ष मुनिका दुई किशोरलाई बलात्कारको आरोपमा गोप्य रुपमा फाँसी दिएको एम्नेस्टी इन्टरनेशनलले बताएको छ । एम्नेस्टीले अन्तरराष्ट्रिय कानून र बालबालिकाको अधिकार भंग गरेको भन्दै यसको चर्को विरोध गरेको छ ।

मेहदी सोहराबिफार र एमिन सेदाघत कजन हुन् । उनीहरुलाई १५ वर्षको उमेरमा सन् २०१७ मा पक्राउ गरिएको थियो । उनीहरुलाई गत बिहिबार सिराजको दक्षिणी सहरमा फाँसी दिएको बेलायती संगठनले बताएको छ ।

यी किशोरको शरीरमा कोर्रा हानेको डामसमेत देखिएको छ जसले उनीहरुलाई मृत्युदण्ड दिनुअघि निर्घात कुटिएको पुष्टि हुने एम्नेस्टीले बताएको छ ।

एम्नेस्टीका मध्यपूर्व र दक्षिण अफ्रिकाका निर्देशक फिलिप लुथरले एक वक्तव्य जारी गर्दै भनेका छन्, ‘यस्तो लाग्छ कि यी दुई किशोरलाई दुई वर्षसम्म मृत्युदण्ड दिइने बारे जानकारी बिनै जेलमा राखियो । जीवनको अन्त्यतिर उनीहरुलाई कोर्रा हानिएको थियो र उनीहरुलाई गोप्य रुपमा फाँसी दिइएको थियो,’ उनले भने ।

सन् २०१७ देखि यी दुईलाई किशोर सुधार केन्द्रमा राखिएको थियो । मृत्युदण्ड दिनु एकदिन अघि सिराजस्थित अदेलाबाद जेलमा सारिएको थियो ।

बुधबार यी दुईका परिवारलाई छोराहरु भेट्न अनुमती दिइएको थियो तर आफन्तलाई मृत्युदण्डबारे जानकारी नदिएको एम्नेस्टीले बताएको छ ।

संसारको धेरै मृत्युदण्ड दिने देशको सूचीको इरान दोस्रो स्थानमा आउँछ । चीन पहिलो नम्बरमा छ । यहाँ वर्षैपिच्छे हज्जारौंलाई मृत्युदण्ड दिइन्छ ।

एम्नेस्टीका अनुसार बच्चालाई मृत्युदण्ड दिने देशको सूचीमा इरान अग्रस्थानमा छ ।

सन् १९९० देखि २०१८ सम्म एम्नेस्टीले जेलमा भएका ९७ किशोरलाई मृत्युदण्ड दिइएको तथ्यांक निकालेको छ ।

एम्नेस्टीको वार्षिक रिपोर्ट अनुसार इरानमा गत वर्ष दुई सय ५३ लाई मृत्युदण्ड दिइएको थियो जसमध्ये सातजना १८ वर्ष मुनिका थिए ।

यसका साथै ९० किशोर मृत्युदण्ड दिइने प्रक्रियामा भएको एम्नेस्टीले बताएको छ ।

थप अरु